朋友去旅行不代表奉旨帮你代购

mamatan0505

一年去七八次旅行，除咗会俾人狂问：
你好有钱喎成日去旅行！

之外，仲有另一个烦恼 — 所有人都当咗你捞代购嘅。

咩唔好再叫人旅行买手信，呢啲已经系好基本费事多讲。去一转旅行，循例买手信俾屋企同事朋友旧同学女朋友脢就几旧水。其实系friend嘅，知你钟意就会自动自觉买架啦，特登买啲未必啱洗嘅嘢系浪费我嘅金钱又浪费你嘅时间。

而家潮流系兴，知你去台湾韩国日本，就准备定水蛇春咁长嘅清单麻烦你帮我买吖唔该晒 ：） 上至化妆品电子产品下至帮佢女朋友买个bra都有，系笋过网购呀我同你讲，起码唔洗俾运费。

通常佢哋系send一大堆cap图嚟话要买乜乜物物。我自己就要事先search定呢个牌子边到有得卖，放落边一日行程夹啲，好多时其实都系唔顺路要夹硬兜远路去。去到如果无款无色无码，又要留喺原地直至佢覆我仲买唔买。个旅行先得嗰四五日，唔计头尾搭飞机，斋帮人买嘢可能就用咗半日。

而且买亲嘢都唔知点同朋友收返钱。有时唔同outlet买唔一定同网上标价一样；几个朋友啲嘢夹埋一齐买可能会有折；用外币买要计汇率；唔够现金嘅用信用卡又有手续费总之如此种种之后，单上面嘅价钱同我实际上付出嘅好少可系一样。试过一次收得贵过幅cap图嘅标价，就俾同事串：




哗你以后净系做代购都揾到食啦。

我以后都无再帮呢个人买过嘢。

仲有交收。好多时代购嘅嘢买完都系赶住俾返朋友，每次去完旅行后至少一个礼拜，日日放工嘅行程都系去匀港九新界交收。我试过捧住个台湾买嘅芝士蛋糕返公司，放工捧埋去酒吧生日party，完咗仲要送个蛋糕去朋友屋企楼下，惨过外卖仔。

我都试过请朋友帮我买嘢，但真系试过晒网购淘宝专业代购都搞唔掂，自己一年半载之内又唔会去嗰头旅行先麻烦人哋。

下次有朋友去旅行嘅，就留啲空间俾人，自己上网搞掂啦！





http://topick.hket.com/article/1 ... 0%E4%BB%A3%E8%B3%BC