【突發】928-929 全球連線抗極權！925民記發言全文！

justebelmont

各位香港人、傳媒朋友：

大家好，我係連登「我要攬炒」。今日有幸以特別方式出席民間記者會，目的係協助發布928、929全球反極權行動資料，亦感謝民間記者會代為讀出依封信。

過去三個月，非常漫長。

我地香港人由當日接近不可能嘅反送中，逐漸朝住「光復香港，時代革命」嘅目標邁進。只有爭取真雙普選，還政於民，重組警隊，香港先有可能撥亂反正。

以8月16日 「英美港盟，主權在民」遮打集會為契機，攬炒團隊同全球海外港人開始加強聯繫，並且，喺八月中同尾分別協調咗兩次全球示威活動，聲援香港。

但係，攬炒團隊同各地抗爭者一致認為，我地香港人有能力做得更多，而且要開始對準問題根源 —— 中共極權統治香港。

因此，我地早喺八月就開始圍繞9.28 同 10.1依兩個日子，籌備更大型全球行動同國會遊說工作。經過一個月籌備，謹此正式宣布超過18個國家、42個城市，將會喺928-929週末，呼應 「全球連線-共抗極權」行動。

同時間，九月份適逢另一批連登巴絲呼籲929全球遊行；有見及此，我地決定將兩股動員力量合流，誠邀更多海外港人928-929加入抗爭，全球開花。

截至今日，響應928-929反極權行動嘅國家已經有：美國、加拿大、英國、愛爾蘭、法國、德國、瑞典、荷蘭、丹麥、比利時、意大利、烏克蘭、波蘭、愛沙尼亞、馬來西亞、台灣、日本、澳洲、紐西蘭等19個國家，名單仲會不斷加長。部分地區更得到流亡海外維吾爾族、西藏人答應到場支持，合力反抗極權。

大家或者會疑惑：
點解最近928-929主題同文宣逐漸統一為全球反極權，而唔係「赤納粹」搶眼標題？

其實，擬定大主題嘅時候，攬炒團隊同世界各地抗爭者接觸過唔同西方政客、記者、同普羅大眾，反覆探討提出反赤納粹、Anti-Chinazi 依個字眼喺西方社會係唔係恰當。

縱使我個人同意共產黨同納粹黨無分別，甚至更差，不幸地，收集返黎嘅英美法德意見，一致認為赤納粹字眼極不恰當。

因為觸犯文化禁忌同傷疤，反而造成西方對香港抗爭者反感嘅巨大風險；而赤納粹旗更一度令部分人誤會香港人支持納粹。因此，聆聽外國聲音後，我地嘗試以「自由對抗極權」號召928-929全球行動。

話雖如此，我地始終唔係，亦唔想成為大台。假如有手足堅持使用赤納粹字眼，我地雖然不認同，但會尊重、不割席，只求大家三思而後行。事關國際遊說工作同輿論，可以一子錯，滿盤皆落索。

最後，大家無需要妄自菲薄、迷失、氣餒。

100年前，孫中山前無互聯網、無飛機，依然成功組織全球網絡，連結本土國際力量，對抗暴政。100年後，我地擁有多好多倍資源、科技、工具，所以只要槍口繼續一致對外，我地實在比孫中山等先烈有更大潛力、本錢，以小勝大。

抱歉，依份唔係一篇正規新聞稿，因為每次公開發言我都係以遺書心態去寫。只有眼前路，沒有身後身。

香港人，928、929全球見。

光復香港，時代革命，寧化飛灰，不作浮塵。
Stand With Hong Kong. Fight For Freedom.


-----------------------------------------------------------------------------------------------------------------------------------

大家认为马来西亚华人会为了香港人举办 ANTI-BERSIH 反希盟政府吗？？？

SuperKedah

港廢.......丟!