LG G5 UI 大陸化!外媒評測狠批預設無 App Drawer
LG 日前在 MWC 2016 大會上,發表了新一代的旗艦新機 LG G5。從外型上相比去年旗艦 G4、V10,版主真心認為 G5 呢個設計,新不如舊。但如果從功能層面黎睇,佢嘅模組式設計又確實俾到人驚喜,金屬機身又可以換電,呢點真係以前無諗過嘅,版主都要俾個「服」字佢。不過,唔少外國媒體係實測後發現,原來 LG G5 係無 App Drawer,要知道 App Drawer 對於非中國大陸嘅手機用家來說,係幾咁重要的事,居然無 App Drawer,LG 係咪連手機都要大陸化?唔好呀!
預設 Launcher 無 App Drawer?版主得知 LG G5 無 App Drawer,心諗:咁死得啦! 連 App Drawer 都可以移走,今次 G5 仲唔玩完? 見到有唔少外國傳媒都批評,例如 iTechTriad 就指出,LG 手機無左個 App Drawer 有機會會令好多用家唔 buy ("However one big change that plenty of users are probably not going to be a huge fan of is that LG is removing the app drawer on this device.") ,而 The Verge 亦提到,LG G5 而家呢個設計,似乎更親 iPhone 用家以及大陸 Android 用家咁話喎 ("Now it's a single-layer interface, which will prove more familiar to iPhone users as well as many Chinese Android phone owners.")。
LG G5 雖然未賣,但若果你對呢部拆蓋換模組嘅手機有興趣,以下呢條片,記得 Backup,教你重見 App Drawer 方法:
LG G5 飛甩 App Drawer 大陸化?Google 都 Buy 喎!
手機介面一個小小的 Icon 竟然引發不少手機迷熱烈討論?講緊嘅係 LG 剛剛發表嘅旗艦機 G5,被外國網站發現預設的「HOME」Launcher 並沒有 App Drawer,介面變得同 iPhone 或者不少大陸手機一樣。外國不少網站就狠批 LG 此舉趕客,講到明消費者唔 Buy 呢個設計;不過用戶可能要適應一下,因為 Google 似乎都認同無 App Drawer 的設計。
Google I/O 將會在 5 月 18 日舉行,預計 Google 將會正式發表新一代 Android 系統「N」,雖然最後的版本要到今年秋季才正式上場,但已經有 Android N 的消息流出。根據線人報料,App Drawer 將會在 Android N 上消失;兩位有機會一睹 pre-release 版本 Android N 的線人均作出確認。Google 在 Android 6.0 Marshmallow 時已經針對 App Drawer 作出過調整,在 Android 7.0 上將之廢除,意味著新安裝的軟件 Icon 會好似大陸手機 UI(或 iPhone),排在 Home Screen 主頁,用戶要自行製作 Folder 將 Icon 整理好。
假若 Google 都 Buy 呢個設計,相信好多手機品牌亦會考慮跟隨。最近有傳聞指 Google 有意將系統升級統一處理,避免碎片化問題。如果傳聞屬實,「他朝君體也相同」,未來 Android 手機的介面都不會有 App Drawer。為 Google 生產多部 Nexus 的 LG 可能只是收到風,提早移除 App Drawer,實在係走在潮流尖端。網友認同嗎?